دفعوه ما رجع من وحده الباب ,,, للشاعر ايهاب المالكي

***********
دفعوه ما رجع من وحده الباب
على بابج بعدها اثار الجدام
انتي الجنة بس ما رهموا وياج
لذلك وي جهنم صاروا ولام
بيت الانتي بيه ويسكنه ابوحسين
الـ يدكَ بابة لازم يلبس حرام
انا حاير شلون الباب ينلاح
عالي وما تلوحه جفوف الاقزام
كان الله بعونج شفتي بسمار
بالمحسن ينفذ حكم الـ اعدام
نفسهم همه ذولة الـ دفعوا الباب
نفسهم باجر يحركَون الخيام
اجو يم بابج وفز خايف الليل
مثل الـيصحى من نظرات الاحلام
وتبعــنــاهم وبالتــاريخ يمــشون
شما يمشون خطوة يوكَع لثام
ملامحهم سيوف منكَبة بليل
ومثل شكل الخناجر عدهم اجسام
جيبي وياج ضلعج شاهد اثبات
من ينفخ الصور وتحيى العظام
كسر ضلعج عكس كل جيش مكسور
الجيش الـ ينكسر ما يرفع اعلام
لذلك باجر انتي بيوم الحساب
على هيئة ضلع ينطونج وسام
اذا تتقارنين بثورة الدين
بس بابج يعادل فجر الاسلام
يوم الله يختم فوق الافواه
من بابج خصمج يسمع ختام
اذا ينشر المرء بهيئة اعمام
من جفوف اديهم تطلع اصنام
بيتج بالطبع مستهدف يكون
لان هو اول حكومة تحب الايتام
بعيون اليتامى صورتج طير
ابيض وبسماج رماح وسهام
خفت الجرح ينشف والهوى يضيع
تدرين اليتامى بجرحج تنام
الهوى يجيب أعلى متنة عطر الورود
بس عطرج تجيبة متون الايام
ورة بابج الطف موجود بالبيت
طف بس عايزة عباس وخيام
ما يقبل علي يمسونج بسوء
لكن للرب ما يكسر احكام
مقامج عد علي شي فوق الاوصاف
بكثر ما عن مصابج كتبت اقلام
بختهم بالوصية ولا ما جان
ينعد الصفر من ضمن الارقام
وحقج لو علي متناوش السيف
جا عرفوا ابيتج ربج شضام
ومحد يرجع من السيف بي روح
ما يطلع الـ يدخل حقل الالغام